အို ဖေဖေ...
ချစ်ခင်မြတ်နိုး လေးစားသမှု ဆိုတဲ့
ဖခင်အပေါ်ထားတဲ့ မေတ္တာဟာ
မြင့်မြတ်နေပေမဲ့
အဲဒါလဲ သမုဒယ။
အို မေမေ...
ယုယပိုက်ထွေး ကြင်နာမှု ပေးတဲ့
မိခင်ကို ချစ်တဲ့ မေတ္တာဟာ
ဖြူစင်နေပေမဲ့
အဲဒါလဲ သမုဒယ။
အို ချစ်သူ...
စိတ်တူကိုယ်တူ ယုံကြည်မှု ရှိတဲ့
ချစ်သူ့အပေါ် ထားရှိတဲ့ မေတ္တာဟာ
မြင့်မားပေမဲ့
အဲဒါဟာ သမုဒယ။
အို သားသမီး...
ထွေးပိုက်ကြင်နာ လမ်းညွှန်မှု များနဲ့
သားသမီးအပေါ် ထားရှိတဲ့ မေတ္တာဟာ
အတုမရှိပေမဲ့
အဲဒါဟာ သမုဒယ။
အို.....
လောကတခွင် လှည့်ပတ်တွေးတော့
အရာရာဟာ သမုဒယ...
အဲဒီ့ကြိုးနဲ့ ချည်နှောင်ခံဖို့
ငါတို့အားလုံး အတူတကွ
ငြိမ်သက်စွာ လဲလျောင်းပေးနေကြပါလား။
ရုန်းထွက်ဖို့မှ ငါတို့မတွေးတော့
သမုဒယ အလုပ် သမုဒယ လုပ်မပေါ့။
သူ့တာဝန် သူကျေပေမပေါ့။
ဆက်ပြီးတော့ ချည်နှောင်ပေဦးမပေါ့။
သင်ဟာ ကျွန်ုပ်ရဲ့ စိတ်ကို ပူပန်စေတယ်။
သင်ဟာ ကျွန်ုပ်ရဲ့ နှလုံးသားကို မီးလောင်စေတယ်။
သင်ဟာ ကျွန်ုပ်ရဲ့ အတ္တကို အားပေးတယ်။
နောက်ဆုံး ကုန်ကုန်....
သင်ဟာ ကျွန်ုပ်ရဲ့ သံသရာလမ်းကို ပိုရှည်စေတယ်။
အို... သမုဒယ
သင့်ကို ကျွန်ပ် ကျွန်မခံနိုင်တော့
သင့်ကို ကျွန်ုပ် မခစားနိုင်တော့
သင့်ကို ကျွန်ုပ် လည်စင်းမပေးနိုင်တော့...
သင့်ကို ကျွန်ုပ် တော်လှန်မယ်။
သင့်ရဲ့ တာဝန်ကို သင်ကျေသလို
ကျွန်ုပ်ကလဲ သင်မချည်နှောင်နိုင်တော့အောင်
မဂ္ဂလက်နက်နဲ့ တိုက်ဖျက်မယ်။
အို.. သမုဒယ
သင့်ကို အနိုင်တိုက်ဖို့
မဂ္ဂလက်နက်ကို ကျွန်ုပ် ရဲရဲကြီး ကိုင်စွဲမယ်။
မေတ္တာဖြင့်
ထိပ်ထား
(၁၁.၁.၂၀၁၁ ၁၀နာရီ ၃၀ မိနစ်တွင် ဖခင်ဖြစ်သူ နေထိုင်မကောင်းသည့်အကြောင်းကြောင့် မနေ့ညနေတည်းက စားမရ ကောင်းကောင်းအိပ်မပျော် မိုးလင်းတော့လဲ အစားမဝင် ဖြစ်နေသည့် မိမိကိုယ်ကို ဆုံးမရင်း ရေးသားသည်။)
No comments:
Post a Comment